За Проектот

„Да ги слушнеме и гушнеме“ е кампања наменета на генерациите пред нас, на оние кои нè пораснаа и ни го покажа патот по кој денес чекориме. Единственото нешто кое нè води е топлината, љубовта и вербата во подобро утре кое тие ни ги подарија. Да им покажеме дека сè уште ни се потребни, повеќе од кога било. Нивниот совет е важен за секој од нас. Тие се наши родители, баба, дедо, комшија.

Да им покажеме дека годините не се пречка, туку извор на мудрост. Оваа генерација е неисцрпен извор на љубов и знаење кои нѝ се потребни на сите, бидејќи нашата заедница и култура не се темелат само на делата на големи поети, научници, туку и на безброј вредности од анонимните херои кои ги среќаваме секојдневно, а за кои имаме сè помалку време.

Слоганот „Да ги слушнеме и гушнеме“ е мала пауза во забрзаното секојдневие. Тоа е миг во кој помислуваме на нашите родители, на нашите баби и дедо, на постарите членови од семејството или од соседството.

„Да ги слушнеме и гушнеме“ се обраќа на помладите, на децата и внуците, кои во трката со брзото секојдневие некогаш и не можат да одвојат време за постарите. Ова е повик за освестување на секој од нас, дека од повозрасните можеме да научиме многу, бидејќи тие се чувари на мудроста. Нивното искуството е инспирација, а тоа е една од максимите на оваа кампања.

„Да ги слушнеме и гушнеме“ се одвива во неколку етапи, во соработка со: пензионерски здрженија, домови за стари лица, училишта и градинки низ целата земја. Интегрираната кампања обединува најразлични активности и се одвива на сите канали за комуникација, вклучувајќи ја и документаристичката компонента.